Instagram

الثلاثاء، 25 أغسطس، 2015

شهادة مهند سمير.. تجميع هاشتاج #وسخات_ميدان






تقديم:
حكايات مهند على مسؤوليته، ولست أرى أنها الحقيقة، كما أنني لست ممن يرون أنه خارج دائرة الشك، والحكايات عنه تتهمه بكثير مثلما يتهم هو به الأخرين. بس أدينا بنتفرج عليهم. ونحاول نفهم.




#‏وسخات_ميدان (1)
ال 18 يوم اجمل واحلي ايام حياتي الميدان اامن مكان في مصر حسني مبارك تنحي والصفقه ابتدت تتعمل الاخوان قبليها بيوم راحواا قعدواا مع عمر سليمان
مبارك تنحي ومقدرش احدد بقي مين اللي كان بيعمل كداا علشان منافقش
بس الذقون قعدت تتلف الميدان وبيهتفواا

الشعب يريد اخلاء الميدان وفعلا معظم الميدان مشي وده كان اول خزواا ان احنا سيبنا الميدان من غير جدول زمني لمطالبنا



‫#‏وسخات_ميدان (2)
بعد التخلي بتاع مبارك المجلس العسكري جاب شفيق رئيس للوزراء اول مره الجيش يضرب فينا بعد ما كانواا ولاد الوسخه اكلين شاربين معانا اتجمعنا بعد العشاء في الصانيه واتقسمنا تالت جبهات جبهة بتاعت الجبهة الوطنيه للتغيير احمد معتز ودينا الغمري وباكنجهام وحسن علي الله يرحمواا كانت اكبر غلطه عملها بتهيالي الوحيده ان اشتغل مع الناس ده فتره علي فكره حسن علي اترمي من بلكونه شقتواا والداخليه قالت انتحر و قتل في ظروف غامضه ايواا الاتنان
وكان معاهم بردواا فرقه النطيطه بتوع ائتلاف شباب الثوره وحبه قليلين من الناس المحترمه دول راحواه عند مجلس الوزراء واتفشخوه هناك من الجيش وجبهه بتاعت باب اللوق ودول اخواتنا الرجاله ومنهم احمد عصام وجبهه تالته احنا طبعا بلا فخر رجاله طلعت حرب ومش انا اللي هحكي عنهم وبردواا الجبهتان دول اكلواا علقه بنت وسخه هما كمان ومحدش يقول ماجد بوليس ده ابن احبه كان بيضرب معاهم والهي ماجد بوليس حبس ميدو مطريه اليوم ده وهو يكدبني وكل اللي حصل ده كان بسبب الاسامي ده والائتلاف اللي كان النطايطه بيعملواا والاخوان وحزب الوفد والنصارى والتجمع ولسا فيه تاني بس واحده واحده كداا
28 فبراير بدايه الوساخه كلها



‫#‏وسخات_ميدان 3
اعتصام مارس بدايه التعريص يعني طارق زيدان
ممدوح حمزه يعني الجبهة بتاعت عامر واكد محدش يقول عمرو ومش عمرو هو محترم بس كل اللي معاه كانواا شمال ولسا وحده وحده اعتصام مارس ده عايزلواا اسبوع لوحده واكيد ائتلاف تعريص الثوره
احنا لسا مبتتدناش علي فكره




#‏وسخات_ميدان 4
‫#‏اعتصام_مارس
حماصه قعد يلعب في دماغ كل اللي علي البوابه علشان نخش نقعد في الصانيه محدش وافق يخش معاه الكلام ده بقي عجب مين بقي
مهند طبعا قولت اروح اقعد مع حماصه وابقي هنا وهنا حماصه عامل ايه بقي اتعرف على واحده اسمها أسماء ده الله يرحمها جالها سرطان واتكلت علي الله ما علينا الخيمه ده بقي مين اللي كان بيمولها طارق زيدان ومين بقي كانوا كلابواا واحد اسمه اسامه ده صاحب الصوره الشهيره اللي مع ماجد بوليس ومحمد فتحي السواق بتاعه وطقم حلو هنجيبواا واحده واحده وقللك بقي بيلموا ناس ويخدواا بيانتهم علشان يعملواا حاجه اسمها
ائتلاف مصر الحره وده طبعا طبعا طبعا هتخدم الثورة وهيكون كيان معارض بيتكلم باسم ثوار ميدان التحرير



#‏وسخات_ميدان 5
9 مارس
كانوا مقسمنها على بعضيهم تالت أجزاء
الاعاشه الجبهة الوطنية
اللي بيتكلموا باسم الميدان ممدوح حمزة
وائتلاف شباب التعريض وطارق زيدان
واللجان الشعبية احمد توفيق
والدنيا كانت حلوة. والاشيه معدن



هامش
من قام بقتل الثوار في محمد محمود ومن قتل الاخوان في رابعة عسكري
متخليش كرهك للاخوان يعميك عن الحقيقة. لو رابعة كان فيها سلاح، ميدان التحرير كان فيه سلاح، الاخوان خانو الثورة وحطو ايديهم في ايد المجلس العسكري، الثوار خانو الثورة وحطو ايديهم في ايد الفلول. 30 يونيو كان انقلاب أملس قام به العسكر بأموال الفلول واستغلال الثوار بطريقه غير مباشرة. مرسى كان لازم يمشى باستفتاء


#‏وسخات_ميدان 6
نقول تاني انا مش محسوب على حد انا محسوب على نفسي
ومكنتوش بتكلم قبل كده علشان مجتليش فرصه بس مش اكتر اللي حصل ايام المجلس العسكري بحكيه علشان متكلمتش قبل كده عنه وكنت هتكلم عن الشمال بتوع فترة الإخوان بس لما أقول االي عايز اقوله كله عن فترة المجلس العسكري وهقوله بردوه
فترة الإخوان ومفيش وساخه وتعريص اكتر من كده
أولا اول من دخل السلاح ميدان التحرير كان حماده مصرى واللي كان بيجبلوه السلاح علشان يوصلوه للرجاله الفرده كانت بتيجي من أرض اللواء من عند عباس الرأوي ومصطفى الجندي كان بيجيب البنادق ومجدي عشم كان بيجيب الطلق وعباس بردوه كان بيبعت لحماده طلق هوب مين قالت اشمعنا أنا ميرفت موسي بقيت هي كمان بتجيب سلاح وطلق للي كانوا معاها مين بقي ظهر بعديها علطول فياض كان علطول معاه محمد وديع بتاع ظباط 8 أبريل وده كان فيلم تاني لوحدة وبعد كدا ظهر البوب الكبير ممدوح وده بقي مخابرات علي فلول علي احنا آسفين يا ريس متعرفلوش مله وعلى فكره انا اتعملت مع ممدوح كتير وكنت بحبه لغايه من قريب جداا
وما خفي كان اعظم



‫#‏وسخات_ميدان 7
الجنب بتاع حماده مصرى
قولنا الفرده كانت بتيجي من أرض اللواء من عند عباس الرأوي وعلى فكره عباس ومحمد مصطفي كانوا جيران سالم مديح الله يرحمه ونرجع ونقول سالم مات ليه ومين اللي موته سؤال يطرح نفسه الله اعلم بقي مينفعش طبعا ننكر دور اسامه منصور وسامح المصرى واكيد طبعا مجدي عشم والطلق اللى كان بيجيبه من الداخليه ومصطفي الجندي أبو جلابيه اللي كان بيجبلهم سلاح عن طريق أحمد فضالي وشبل همام وجرير منصور رجاله فتحي سرور والجدير بالذكر علشان تبقي شهاده حق كان فيه وسط المجموعة ده ناس محترمه ولما شافت الوساخه ده بعدت زي محمد عيد وكريم عجمي
ولسه في من ده كتير و ما خفي كان أعظم





‫#‏وسخات_ميدان 8
هى دائرة وحده مرتبطه ببعضها الصغير بيجيب الكبير. المره دة مش هكتب على القتل والسلاح اللى كان في الميدان
هتكلم على المكاسب اللي كسبوها من تجارة الدم وللاسف كسبو منه كتير اوي
ائتلاف أرض اللواء اللي اتعمل بدم سالم مديح
وأعضاء الائتلاف اللي أكلوها والعه
عباس الراوي
سليمان الخطيب
عادل هوجن
عبد النبي شحاته
ميزو
بدر
أبو فاروق
أيمن
محمود الراوي أخو عباس
محمد مصطفى وهو ساب الائتلاف بقاله فترة
وعلشان مبقاش بكدب او بنافق انا معرفش شخصيا في أعضاء الائتلاف غير محمد مصطفى وعباس علاقتى كانت مع محمد كويسه وبعزوة وعباس مكنتش أعرفو أوي كمان، كنت بشوفو ازيك بس مكناش بنتعامل مع بعض
والغطاء السياسي للائتلاف كان مصطفى الجندي وطبعا حمادة مصري
والمره دي في كام اسم هيجد في الموضوع زي
عمرو الشوبكي. ايوة هو عضو مجلس الشعب السابق وعضو جبهة الانقاذ
عبد الحكيم عبد الناصر. ايوة هو بردو ابن رئيس الجمهورية الاسبق جمال عبد الناصر
حسام عيسى. أيوة هو بردو الوزير الاسبق للتعليم العالي في حكومة البوب البرادعي يعنى
عباس يقى اللي بقى المتحدث الرسمى باسم الائتلاف واللى هيبقى أغلبيه الكلام عليه، عمل بالائتلاف أحلى شغل في أرض اللواء
وضع يد على أراضي، فرد أتوات وبلطجة، مشاريع تطوير للمنطقة
زي ايه بقى علشان محدش يقول إن احنا بنفتري على الناس الشريفة بالباطل
وضع ايده على ترعه الزمر بعد ردمها وهدم زواية جامع بجانب الترعة بحجة عمل سلم مشاه وكل ده بموافقة محافظ الجيزة على عبد الرحيم وأغلبية اجتماعات الائتلاف مع المحافظ كان بيحضرها حمادة مصري
ومحيط معظم الارض دي اتحول لجراجات سيارات بيكلو منها عيش رجالة عباس وأكيد هو طبعا تمام
هوب المصلحة الاكبر الامارات بعتت منحة بـ50 مليون جنيه لـ13 منطقة عشوائية. الاداره الهندسيه للجيش هي المشرفة على الموضوع. تلت الميزانية بس لمنطقة أرض اللواء. في بقى مناقصة اتعملت من الحي والمناقصه رسيت على عباس وأعضاء الائتلاف بمساعدة مين المحافظ ونائب رئيس الحي: سامى الخواجة
المشروع كان سفلته واناره ورصف وتبليط الكلام دة كان رمضان اللى فات
الشركه أخدت المتر بـ11جنيه قصت 2 جنيه
وسلمته للحي. الحي وسمسار قصولهم جنيه. وسلموه لعباس اتفق عباس على متر الصبة اللى بتتعامل قبل الانترلوك بـ6 وكان بياخد فرق 2 جنيه وكان بيسلم متر الانترلوك للمقاول بـ4 جنيه
يبقى كدة الفرق 4 جنيه في مشروع تطوير للمنطقة كلها شوفو بقى كام ألف متر عدو انتو بقى
ده غير الإنارة
لسه بقى بقيت المشروع منقول ليمين المحور من شهر بالظبط
الغريب بقى واللى قرفني في الموضوع ده إن أخو سالم مديح انضم للائتلاف وراكب فى الليله دي. احاا يا عم أخوك اتقتل
وعباس واخد جراج كبير أوى قصاد مرور الجيزة واللى مخلصلو موضوع الجراج ده عمرو الشوبكي علشان عباس وقف جنبو ودعمو فى انتخابات 2012 بتاعت الاخوان. أصيل عمرو مبينساش حد وقف جنبو
ويا محمد يا مصطفى انت خرجت من الائتلاف علشان ريحته فاحت والمحافظ ورئيس الحي اتشالو. انت ايديك متوسختش يدم وأنا عارف كدة بس الله أعلم بس انت كنت شايف وساكت وعجبك وعلى مزاجك انا مظلمطكش وعارف انك بعدت عنهم وبتحاول تصحح غلطك معاهم بس اللي باقولو حصل
نرجع لمرجوعنا هتقولى ايه علاقة عبد الحكيم عبد الناصر وحسام عيسى بالفيلم دة. حاضر هقولك مصطفى الجندي من ساعة ما نزل أيام الاخوان وهو بيحاول يعمل جبهة عضم شعر ابيض أسامى ليها وضعها السياسى والاجتماعي. هنجبهوهم بس واحدة واحدة وحسام عيسى وعبد الحكيم عبد الناصر كان عجبهم كارت مصطفى الجندي يتاع سالم مديح. مؤتمرات وندوات واجتماعات ولقائات ومداخلات ويلا بينا
عايز بقى اقول حاجة. أنا نزلت الميدان وانا مكنتش تميت 18 سنه فا انا شوفت كل حاجة وعارف الكل على حقيقته لو انتو عملتو فانا عارف كل حاجة انتو عملتوها لو كنت ساكت قبل كدة مش خوف منكو او جات فترة مكنتش فاهم شويا بس لا كنت بظبطلكو بس c.v بتاعكو
ووعد ووعد الحر دين هاقول كل حاجه اعرفها خلال الفتره اللى شاركت فيها فى الثورة كلها
وكل اللى قولتو ده وقولتو قبل كدة  سطر فى مجلد

الصورة ده لمؤتمر للائتلاف. وهو دة عباس الراوي اللي جنب يوسف الحسيني








‫#‏وسخات_ميدان 9
معلش انا ماكنتش بكتب الايام اللي فاتت علشان كان في احداث كثيرة واخرها اعدام 6 وتعيين الزند وزير العدل واني اليومين اللي فاتوا ماكنتش بقدر افتح الاكونت وكمان تم إلقاء القبض علي اكثر من 40 متهم في احداث مجلس الوزراء ولسا لغاية دلوقتي معملوش اعاده إجرائات فالوضع بقي صعب بالنسبالي شويه اني ابقي أونلاين طول الوقت و بصراحة انا معنديش استعداد اقع في أيديهم وارجع السجن
نرجع لمرجوعنا انا بحمد ربنا كل يوم اني كنت مش مع الناس ده وضدهم مع أن في ناس حسبتني عليهم بس ربنا وحده هو اللي يعلم اني كنت بكره الناس ده وأد ايه وقفت في وشهم لوحدي من اول يوم عرفتهم فيه
اول يوم انزل فيه الاعتصام ضد مرسي كان اول اعتصام يتعمل في ميدان التحرير ضد الاخوان اللي هو بعد موت جيكا وبعد احداث الاتحادية كانت اول مره اشارك في اعتصام اول ما خرجت السجن كان السلاح لسا ظاهر في ميدان التحرير كان في طلعه حماده المصري بيجهزلها كان مصطفي الجندي قائله يبعت العيال يعملوها كانت حريق حزب الوفد اللي اتهم فيها الإخوان المسلمين فيما بعد لا مش الاخوان هما اللي ولعه في الحزب لا ده حماده المصري وعمل من ده كتير زي حريق مؤمن والقزاز ومقرات الإخوان اليوم ده واللي يشهد علي الكلام ده كثير اتخنقت مع حماده قولتله انت ممسك العيال سلاح عايز تحبسهم في الوقت ده كانت لسا مجموعة حماده بتقول يا هادي كان مصطفي الجندي لسا مجبش سلاح تقيل بنادق حي وخرطوش فيما بعد كان ساعتها السلاح اللي موجود في الميدان كان مع حماده بيجي من مصطفي الجندي واالي معاه وكان في سلاح موجود في خيمه خالد البطران بيجي من الظباط المتقاعدين

ميدان التحرير كان في سلاح واللي ينكر منافق السلاح اللي كانوا بيجيبوه الفلول والمزروعين من رجاله المخابرات وسطينا




‫#‏وسخات_ميدان 10
احداث الاتحادية اللي اتقتل فيها الحسيني أبو ضيف في تلك الأحداث كان الثوار والإخوان في حاله احتقان وقفين لبعض علي غلطه علشان يموتو بعض هو ده اللي كان مطلوب مصطفي الجندي الوقت ده كان لسه مكنش عمل جبهته اللي ضمت كتير في ما بعد ومن المع نجومها
عصام خير الله
عبد الحكيم جمال عبد الناصر
حسام عيسي
نور الهدى
محمد غنيم
سامح عاشور
محمود كبيش
وباقه من نجوم الساحه السياسيه الصاعده والواعدة كان بيستعين بناس باجر من عابدين والسيده زينب قبل احداث الاتحاديه
الكلام علي لسان واحد من السيده زينب اسمه عمرو الجزار. مصطفي الجندي راحلوا عابدين عايز ناس تبقي موجوده في الاتحاديه من عند عمرو الجزار بسلاح. عمرو قالوا عايز نص مليون جنيه انا هاخود ناس بسلاح وانزل الاتحاديه ببلاش افرض حد اتحبس مات انا اللي هتسال في رجالتي نص مليون جنيه يتحطوا قصادي اعملك اللي انت عايزه مصطفي الجندي مرضيش شايف ان نص مليون كتير
حماده لقي حل في ناس في ميدان التحرير ممكن تعمل كده ببلاش لمجرد كرههم للإخوان نجبلهم كام فرد وكام كرتونه طلق ودول امرهم سهل عباس الراوي مش بعيد مشوار لغايه ارض اللواء واحنا اولي بالنص مليون والرجاله دي هتعمل الواجب وده اللي حصل اكتر من 70 كرتونه طلق جات من ارض اللواء وشويه فرده.
 انا مش هقول مين الناس إللي راحت بس أقسم بالله وربي إللي يعز ويذل معظم اللي راحوا ما كانوا عارفين ان الناس دي كده واعترفوا بغلطهم وبعدو عن الاشكال دي والله ما كانوا فاهمين بس الرجاله مرحتش ضربوا الا بعد موت الحسيني أبو ضيف وكانوا رايحين علي ان الإخوان قتلوهم مع ان اللي قتل الناس في احداث الاتحادية هي الداخليه واللي يقول غير كده بيكدب علي نفسه




#‏وسخات_ميدان 11
قد يكون هناك من يكترث
قد اطيل عليكم قليلا لكن اعذروني
سوف أحوال ان اختسر علي قدر استطاعتي 28 يناير 2011 اول مشاركة لي في الثوره نزلت من منزلي و لم أكن قد اتممت ال 18 عشر من عمري لم يكن عندي وعي او خبره سياسية مثلي مثل معظم جيلي لكن كان عندي دوافع تجعلني اشارك
في الميدان وجدت حب , عائلة , وعي سياسي , ثقافات , افكار كلها جديدة بالنسبه لى ولدت من جديد رايت الحياه بشكل مختلف حلمت مع الموجدين بدوله جديده مجتمع مختلف يوجد به حريات ، آراء جديده ، افكار جديدة حلمت معهم بمدنيه الدوله
عرفت قيمه الحياه عرفت معني كلمه انسان اصبحت علي قناعه تامه ان ثوار يناير علي حق و ثوره يناير المجيده ثوره شباب قامت من اجل اهداف ساميه مثلما قلت فيما سلف ذكره لم يكن لي خبرات او وعي سياسي تعرفت علي جميع الافكار داخل الميدان لم انضم لحزب ما او حركه او جبهه او حتي رابطه لاني لم اكن اريد ان يقتصر معي الوضع علي فكرا ما
كنت اريد الحريه المطلقه استقلالية الافكار فلم اتبع احد تبعت نفسي و تبعت ما اراه من وجهة نظري المتواضعة شراكت في كل احداث الثوره حتي احداث مجلس الوزراء اصيبت بطلقه حي في قدمي اليمني استشهد اعز صديق لي شهيد الله رامي الشرقاوي هو يحاول ان يسحبني من خط النار تم اعتقالي لمده تزيد عن 10 اشهر من
8 يناير2012 حتي 28 اكتوبر 2012
تم الحكم عليا مؤخرا في تلك القضية في شهر فبراير الماضي لعام 2015 بالمؤبد 25 سنه سجن
لاني اختصمت محمد حسين طنطاوي وزير الدفاع الاسبق و سامي عنان مساعد وزير الدفاع الاسبق و قلت في محضر النيابه ان الجيش هو من قام بقتل رامي و اصابتي في قدمي
خرجت من السجن عندي ارضيه سياسية مثلما يقولون و الضوء كان مسلط عليا كان يتمني الكثير ان يصبحوا مكاني لم اشارك في لقاء تليفزيوني غير مره واحده و عرض علي الكثير من اللقاءات مع كبار المذيعين الرواض في ذلك الوقت لكني كنت ارفض فما هو الفكر الذي سيضيفه فتي لم يتجواز ال 19 عشر من عمره فانا مؤمن بالتخصص و ايضا انكار الذات فسبب كبير من سبب ضياع ثورتنا هو ظهور ما يسمون انفسهم بالنشطاء علي الفضائيات اصبت من جديد في ليله راس سنه 2013 بطلقه خرطوش في الجزء الأيسر من وجهي استيقظت من غيبوبه و جدت نفسي بين أشخاص لم اكن اعرفهم من قبل فالجميع يتاجر باسم البطل علي الفضائيات جميع احزاب و حركات و ائتلافات مصر اعلنت اني عضو فيها و انه يجب القصاص من نظام الاخوان من اجل ما قاموا بفعله بي مع ان من قام باصاباتي لم يكن اخوان بل بلطجيه ارسلهم معوان و رئيس مباحث قسم النيل بسبب مشكله قومت بافتعالها مع معوان و رئيس مباحث القسم
سلط عليا الضوء من جديد لكن تلك المره كانت اقوي
لم اخذ فرصه حتي استعيد عفيتي فاصبحت مكروه لعدد كبير من
من يلقبون أنفسهم بالثوار بتوع يسقط كل من خان مع اني لم اري اي منهم ايام المجلس العسكري فهؤلاء معظمهم اول مشاركه ليهم كانت في عصر الاخوان لم يروي ما حدث ايام المجلس العسكري كل ما يعرفونهوا عن تلك الفتره قصص سمعوها علي مواقع التواصل الاجتماعي لمجرد كره لست انا سبب فيه لبعض من كانوا أصدقائي
او شهره اراضها من قام بتشويهي لم يفرق معي ذلك لاني لم اشارك في الثوره من اجل ذلك فالنيه لله و حده والا يهمني اراء البشر فهو من سيقوم بمحسابتي لستوا انتم
استقيموا يرحمكم الله لن تنجح تلك الثورة ما دمتم علي هذا الوضع اصبح الوضع بالنسبه للكثير لعبه و اخرون يروها مطمع اخرون يريدون الشهره اخرون يؤمنون باشخاص اخرون لازالوا تابعين بمن يقولون عليهم النخب اخرون ينتظرون قائد
قطر و كل واحد بينزل في محتطوا الثوره ليست حقرا علي شحص او علي جماعه او علي حركه
اسف علي تلك المقدمه الطويله التي قد يمل منها البعض لكن حتي من يقوم بقراه ما أنشره يعلم من هذا الشخص و ما هي توجهاته فقد نساني البعض لاني لم اكن في الشهره اطمع فقد اتت لي بدل الفرصه اثناتين لكن هذا لم يكن غرضي غرضي الاول و الاخير هو النصر لثورتي
لم انتهي ممن ذكرتهم فيما سلف في كتاباتى لكن الجميع مرتبط ببعضهم بعض فهم جميعا يخدمون جهة واحده
باب اخر من #وسخات_ميدان
محمد وديع ظابط القوات المسلحة الذي انضم الثوره في الثامن من ابريل 2011 هو و اخرين من افراد ظباط القوات المسلحه الذين كانوا يعارضون حكم المؤسسة العسكرية للبلاد لكن ذلك كان فيلم من اخراج المؤسسة العسكرية الذي تم اكتشافه مؤخرا فقد تم الزج به هو زملائه الظباط لاكثر من عام في السجون العسكرية بتهمه محاوله قلب نظام حكم و الخ ..
و لم يتم الافراج عنه الا في عهد الاخوان علي حد ذكري فعاد الي الميدان من جديد فكان بالنسبه للكثير شراره امل محمد وديع الذي عاد الي الخدمه من جديد و تم ترقيته الي رتبه رائد ظل يحوم و يحوم حتي يعلم من هم الشباب الذين يشاركون دائمآ في الاشتباكات وأراد ان يتعرف عليهم فحدث ذلك بالفعل ذلك التعارف تحول فيما بعض الي تدريبات ليست تدريبات بمعني الكلمه بل كان يعلم الشباب أساسيات القتال التكتيكي علي حد قوله و انا بنفسي حضرت معه جلسه لكن لم يعجبني الوضع ليس لاني كنت اعلم ما هو مخططه و ماذا كان يريد و عندي رؤيه لما سيحدث فيما بعد لا
لكن لاني لم احب دور التابع او يقودني احد فا انا لست بتابع و انا اقود نفسي و كل من يعرفني يعلم عني ذلك بالفعل شكل وديع مجموعته و لكن ليس قبل ان يبهرهم بقدراته فقبل ان يحوم علي الشباب و يجلس معهم كان قد اراهم ما يستطيع ان يفعله في احداث المقطم ليست الاولي بل ثاني احداث التي قد قام فيها في البدايه المتظاهرين بمهاجمة مقر جماعه الإخوان بالمقطم فكل ما قاموا بفعله ليس حبا فيهم لكن هذا حق الله هو الدفاع عن انفسهم لكن هم كانوا حمقي كانوا يدافعون عن انفسهم بالنار الحي الحمقي فكلما كان يصاب أحد من المتظاهرين كانت تزيد شده الحقن بينهم بعض فجاء محمد وديع و معه صديق له سوف اذكر اسمه فيما بعد و هو عارض مشهور يظهر في البرامج و الافلام و الاغاني و كل منهم يحمل بيده بندقيه عيار 762 في 39
موديل كلاشينكوف AK 47
ناهيك عن من كانوا يحملون ايضا اسلحه في ذلك اليوم لكن دعنا ننتهي من وديع فقاموا بعمل عرض ابهروا بيه الشباب و كان همزه الوصل بينه و بين الشباب هو محمد فياض من يحدد مواعيد الإجتماعات وامكان اللقاءات فا من بعد تلك الاشتباكات كثر ظهور محمد وديع و كان يلاحقه مثل ظله محمد فياض
ثاني ظهور لوديع و صديقه كانت في احداث عبد المنعم رياض علي ما اظن فالاحداث كثيره تلك هي نفس الاحداث التي استشهد فيها سالم مديح
فا في نفس اللحظه التي مات فيها سالم مديح كان محمد وديع فوق كوبري اكتوبر يناضل بجانب الداخليه للدفاع عن ميدان التحرير ضد الاخوان انتقلت الاحداث الي ميدان رمسيس كل ذلك لم يكن هناك اي دور للشباب التي تم عمل لهم غسيل مخ فبعد ان انتقلت الاحداث الي رمسيس كان للشباب شبه دور ابتدائي فكانوا يلعبون بافرد الخرطوش امام متظاهرين الإخوان و لم يصيوا احد علي ما اظن
ثم ظهر من جديد علي حد مايقولون ان في ذلك اليوم هجمت مجموعة من الاخوان فجر ذلك اليوم علي ميدان التحرير و راح أثر تلك الاشتباكات شاب اسمه عمرو من العمرانيه لم يبلغ العشرين من عمره فظهر و ايضا في تلك الأثناء كانت هناك مساير لجماعة الإخوان تمر من عند جامعة القاهرة فاشتبكت مع اهالي منطقه بين السريات فاكانت هناك حالة نفور عند الشباب المعتصمين بميدان التحرير لحزنهم علي فقدان صديقهم فا من اين ظهر وديع لا اعلم لم يكن موجود و ظهره فكره ان يثار الشباب من موت صديقهم بمهاجمه اعتصام النهضه مع استغلال ان هناك اصلن اشتباكات مع اهالي بين السريات و متظاهرين الإخوان فتحرك وديع و معه اكثر من خمسه عشر شب لمهاجمة اعتصام النهضه و بالفعل حدث و لن اكذب انا كنت موجود لكن و حق صيامي لم اكن احمل سلاح فانا لم اكن اثق بذالك الشخص فذهبت معاهم لان من تلك المجموعة كان يوجد بها ناس كنت اعتبرهم اخوه و لاني من نفس المنطقه المحيطه لميدان النهضة و قام وديع و من معه بمهاجمة الإعتصام و لا اعلم ان كانت هناك إصابات بين افراد الجماعه المعتصمين بالميدان او لا بعدما أنهوا ما جاؤوا لفعلوا ذهب الكل الي طريقه
ثم ظهر ثاني من جديد تلك الاحداث لم اكن شاهد عليها لكني متاكد بوجوده فيها
احداث الحرس الجمهوري المنصه التي استشهد فيها عيسي
كان محمد وديع متواجد فيها يحمل بندقيته يقف بجانب افراد الداخلية و الجيش يطلق النار علي المتظاهرين و اعلم من كانوا معه لكن ليس بامر مهم ذكر اسامي الشباب ففي الاول و الاخر هم لم يمتلكوا الخبره و العقل الكافي كي يحسبوا الاموار فى ذلك الوقت و هذا كل ما اعلمه عن تلك الاحداث بالنسبه لمحمد وديع
ثم ظهر من جديد في فض إعتصام رابعه ايضا هذه الأحداث لم اكن شاهد عليها ايضا لكني علي يقين بوجوده فيها فعندما حضرت معه تلك الجلسه التي كان المفروض انه كان بيعلم الشباب الرمايه و فك و تجميع السلاح كان يتحدث عن حلمه لفض اعتصام رابعه فهو كان يكره ذلك المكان و المعتصمين فيه و كان دائما يحاول ان يظهر للشباب ان ما يفعلونه هذا هو الصواب و انه لن يقوم بمهاجمة اعزل و انه يقوم برفع السلاح في وجه من يرفعه عليه و ان ما يغعله هذا هو حق الله و كان قد وضع بنفسه خطه للفض و كان يحلم بان يقوم بالفض بنفسه و من معه من الشباب
ثم تم فض اعتصام رابعه ال لا انساني من قبل أفراد القوات المسلحة و الداخليه و كان محمد وديع موجود و كان يساند الشرطه و الجيش اخواته في الخدمه
اسف لتاخري عن النشر منذ اخر مره كنت نشرت شئ يخص الهاشتاج لكن من يتابعني يعلم بما أواجه فأرجو التماس العذر لي




#‏وسخات_ميدان 12
عصابه الفخراني
حمدي الفخراني
عضو حزب الجبهة الديموقراطية ، عضو الجمعيه الوطنيه للتغير ، عضو في البرلمان الشعبي الموازي الذي اسس بعد تزوير انتخابات 2010 ، عضو اتحاد الثورات العربيه ، نائب سابق في مجلس الشعب المصري 2011 ، 2012
ذلك الشخص خان الثوره قبل ان تقوم حتي فا هو مثله مثل معظم جيله
جيل العار يخدم علي المؤسسة العسكرية خان دماء الشهداء و تاجر بسجن المعتقلين لمصلحته الشخصيه فهو لم يشارك في ثورتنا المجيده من اجل و طن افضل بل من اجل فخراني افضل فلنتخطي ما ارتكبه من خيانه للثورة و الثوار في عهد طنطاوي و ناتي الي التمادي المريع للخيانة في عهد الاخوان المسلمين فقد قام الفخراني بتأسيس مجموعه مسلحه كي تقوم بأعمال قد كلف هو بها من جهات سيادية و اظن اننا نعرف من هي الجهة السياديه فاحمدي الفخراني مثله مثل معظم جيله كلب للمؤسسه العسكرية
تلك المجموعة كان يقودها نجله و شخص اخر كنت قد اكن له الاحترام و التقدير لكن طريق المال و السلطه علي ما أظن قد يجعل الكثيرون يتنازلون عن مبادئهم و ذلك الشخص معروف لدي كثير من الثوار و هو علاء زغلول و انتهي الأمر بجزء من تلك المجموعة في السجن لجشعهم فهم فقط لم يكتفوا بحرق مقرات الإخوان المسلمين والا الدخول وسط الاشتباكات و ضرب النار الحي و الخرطوش بل فيما بعد استغلوا تدهور الحال الامني و سرقه 3 بنوك و هم محبوسين علي ذمه تلك القضيه منذ 9 اشهر نقريبا
اول تعارف لي بنجل الفخراني لم اكن اعلم انه نجله فقد عرفته عن طريق شخص لا داعي لذكر اسمه كان يريد ان انضم لمجموعته و قال لي انه معه جميع الموارد سلاح و ذخيرة و انه يسخر تلك الأدوات للوقوف بوجه نظام الجماعه لم اوافق و ايضا لم ارفض فقد تقربت منه قليل كان من ضمن مخططهم حرق مقرات الجماعه رصد و التنفيذ مع كوادر قيادات الجماعه
وبالفعل قاموا بحرق أكثر من 20 مقر للجماعه
رصد وقتل القيادات و الكوادر لا اعلم ان قاموا بذلك فما اقوله شهاده حق لن اقوم بالكذب و الافتراء
شاركوا في العديد من الاشتباكات امام جماعه الاخوان من ضمنها احداث رمسيس ، المقطم ، و الحرس الجمهوري ، بين السريات ، و المنيل
تلك المجموعة قد نسقت مع محمد وديع فيما بعد واصبحوا يقومون بالعمل الثوري معا
كان الممول الاول والاخير لتلك المجموعة الذي جعل نجله يقودهم بنفسه هو حمدي الفخراني بالامر من اسياده
أعضاء المجلس العسكري
وهذا ايضا جزء من وسخات ميدان
وما خفي كان اعظم




‫#‏وسخات_ميدان 13
نافذة اخره لقذرات المجموعات التابعة للنظام كما قلنا فيما سلف ذكره في وسخات ميدان أن كل تلك المجموعات مرتبطه ببعضها البعض هم جميعا يعملون لجهة واحده وقد يكونون لا يعرفون بعضهم البعض وذلك جزم واجتهاد مني قد يكونون جميعا يعرفون بعضهم
أسامة منصور بدوي يقول إنه موجود من ال 18 يوم وانه كأن منسق حملة عسكر كاذبون بالغردقة فإذا كأن موجود فعليا من ال 18 يوم ذلك في حد ذاته كارثة فوجود أشخاص كاهؤلاء بيننا منذ ال 18 يوم يثبت لي أننا تم اختراقنا منذ البداية لكننا كنا غافلين
أول مرة أرى هذا الشخص كأن في ذلك الاعتصام النجس أول اعتصام يقام ضد الإخوان الذى قد أقيم بعد أحداث محمد محمود ( 2 )
هذا اليوم كان أول يوم لي اشارك في الاعتصام
ظهر بعد أن حدثت مشكلة بيني وبين حمادة المصري هي مش مشكله والا حاجه أنا بس اول ما نزلت الاعتصام لقيت الرجالة كلها شايله سلاح وبتضرب نار فسألت مين اللي شايلهم السلاح فا واحد من إخوتنا قالي حمادة المصري وألحق يا مهند علشان هو هيضيعهم
اللي مسكين السلاح مكنوش فاهمين حاجة كلهم محدش فيهم عدى ال 21 سنه كانوا فرحانين بالسلاح لعبه جديده عليهم وخليتهم يحسوا أن هما كده رجاله من الآخر المهم حمادة أخد نصيبوا وبزياده واتمسح بكرمته الأرض ولو كأن رد عليه كنت هضربه مش ممكن انا كنت هعمل كده فعلا
بس هو حوال يمتص غضبي وقالي هفهمك بس أهدي أنت لسه خارج من السجن وفاتك كتير ومتعرفش حاجة المهم روحت قعدت معاه في الخيمه اللي عند المجمع وكأن من ضمن إللي قاعدين عباس الراوي وأسامه منصور وقعد يحاول يشرح لي أن السلاح ده علشان نحمي بيه نفسينا وأن الإخوان هما اللي اضطرونا أننا نمسك السلاح وكأن دايما في كلامه بيستخدم صيغه الجمع وكأن بيأكد علي كلامه اللي حواله المهم أنا شبه فهمت أن الناس دي شمال فسيبتهم ومشيت وروحت لصحابي إللي هما المفروض المجموعة اللي بيحركها وبيمدهم بالسلاح والذخيرة وللعلم كلهم مكنوش صحابي اللي كنت اعرفهم فيهم وكانوا قريبين ليا ثلاثة و الباقي ضموا عليهم في فترة سجني بس كلهم كانوا عارفني علشان اللي المفروض اللي هما صحابي حكوالهم عني كتير فقعدت معاهم لقيتهم عجبهم فكره أن هما يبقوا معاهم سلاح صحابي وانا عارفهم وصلت معاهم لاتفاق مكنوش كلهم موافقين عليه
قولت لهم مش عجبكم السلاح خدوا ومحدش يقدر يقولكوا فين الحاجه اللي اخدتوها هو اصلا بيتحامي فيكوا بناقص من حمادة
هتروحوا في داهيه بسببه وبالفعل عملت كده لمدة أربع أيام وبعديها اتصابت في وشي بطلقه خرطوش والكل مكنش عنده أمل اني هعيش رجع حمادة لف عليهم وعرف يجبهم تاني أنا كنت بين الحياة والموت فا معرفتش اعملهم حاجه وفعلا اللي نبهتهم ليه حصل كلهم اتحبسوا حتي حمادة اتباع معاهم
بس حمادة اللي كأن يعرفوا مكنش قليل فاكان لازم يخرج
فوقت بفضل ألله ورجعت وقفت علي رجلي من الطلقه إللي أخدتها غدر من كلاب الداخليه لقيت إللي شبه متولي الأمور هو أسامه منصور من بعد حبس حمادة
بعيدا عن السلاح والذخيرة اللي أسامة كأن بيجبها
اسامة جاب في خلال 6 شهور اكثر من 5 بنادق خرطوش
و3 بنادق حي وذخيره متعدش وده إللي أنا متأكد منه وما خفي كأن اعظم وكأن بيقول أن هو بيجيب الحاجه دي من رأس ماله الحر حباً في الثورة مش أكثر
أسامه كأن عنده دائره علاقات غير طبيعيه وصلت علاقته أن هو كأن شبه يوميا بيقعد مع الزند وتهاني الجبالي وكأن معاه ارقمهم الخاصه وبيكلمهم في اي وقت
أسامه قام بعمل جبهة دفاع تضم أبرز المحامين الموجودين علي الساحه من ضمنهم محمود قُبيش، سامح عاشور، حسام عيسى، نجاد البرعي، حافظ أبو سعدة
للعلم محمود قُبيش هو اللي بيترافع عن حسين سالم علشان يخلصلوا القواضي بتاعته ويرجع مصر
حسام عيسى أي نعم حسام عيسى كأن من ضمن مجموعة الكبار بتاعت مصطفي الجندي
سامح عاشور مش محتاج اعرف الناس بيه
كل هؤلاء كي يترافعون عن حمادة المصري
أسامه أنسحب من اللعبة منذ فترة ليست ببعيدة
ايام حزب 25 / 30 ده علشان ضحكوا عليه أو مش ضحكوا معجبوش اللي اتراملوا كأن شايف إن هو يستحق أكثر من كده
المره دي بقي مش مخابرات بس لا وكمان فلول يا ريت كلامي يكون لي لازمه ويفوق إللي بيقرا من الغيبوبة إللي هو فيه وأول مرحله للعلاج هو الإعتراف بالمرض مش عيب أنك تغلط بس العيب انك متوبش وتعترف بغلطلك إحنا أضحك علينا من جيل وسخ كأن وسطينا كأن كل همه السلطه والشهرة والمآل وياريت نعرف مين عدونا ومنكررش غلطنا لو احنا عايزين نكمل في طريق الثورة ونجيب حقنا وحق اخوتنا إللي ماتوا
واللي اتسجنوا لمجرد أن هما نزلوا ثورة علشان مؤمنين بحق أن هما عايزين يبقوا بني ادمين
الشباب هما الأمل وهما الثورة مش العواجيز والشعر الأبيض إللي ضيعنا





يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية

الأربعاء، 5 أغسطس، 2015

هشام خليل يشرح: مشروع تفريعة قناة السويس بلا جدوى اقتصادية




فيه كلام كتير متداول حاليا بيحاول يسفه من مشروع قناة السويس الجديده هندسيا, و بيحاول يبين أنه ترعه و إن الحفر طبقا للخرائط لا يتعدي ال 15 كم و خلافه. الموضوع في وجهه نظري مختلف شويه, و بما إن مفيش أرقام متاحة لدراسة الجدوي لمشروع قناه السويس, فقررت أدرس الموضوع شويه و طلعت بالأتي:
بإختصار محاوله  التقليل من حجم العمل الهندسي للمشروع مضلله شويه, لأن الموضوع المعلن من أول يوم هو إن مشروع القناه الجديده متقسمه جزئين, جزء و هو حفر القن للمشروع مضللاه الجديده بطول 35 كم , و جزء تعميق و توسيع الممرات الحاليه في البحيرات المره بطول 30كم و توسعه و تعميق تفريعه البلاح بطول 7 كم. بإجمالي حوالي 72 كم

و علشان مبيعش دماغي لحد دخلت علي برنامج ظريف تقدر تعرف منه المسافه عي خرائط جوجل, بتحددله المسار و هو بيقولك المسافات (مرفق صور للمسارات و مسافاتها) و اللي عايز يتأكد بنفسه يدخل علي اللينكات دي.
daftlogic.com/projects-google-maps-distance-calculator.htm
مسار تعميق الممرات في البحيرات المره 30كم
مسار حفر القناه الجديده 35 كم: tinyurl.com/pt55ab9


 
مسار توسعه و تعميق ممر البلاح 7كم
tinyurl.com/nr2799h


بس الموضوع أكبر من كده, الموضوع متعلق أكتر بالجدوي الإقتصاديه القصيره الأجل و الطويله الأجل, و العوائد المتوقعه منه و مقارنتها بأولويات أخري.
فيه شويه معطيات لازم نبقي عارفينهم علشان نعرف نتكلم في الموضوع ده. و هي كالأتي :
• إن متوسط عدد السفن اللي بتعدي في القناه هو 49 سفينه يومي, و القدره الإستيعابيه حاليا هي 76 سفينه يومي, و أقصي عمق غاطس للسفينه هو 22 متر و أقصي وزن مسموح به هو 240 الف طن (Dead weight)
• الإحصائيه التانيه المؤثره هي إن القناه بوضعها الحالي من عمق غاطس و عرض الممر قادرة علي خدمة64٪ من ناقلات البترول ، ٩٦.٨٪ من أسطول سفن الصب و١٠٠٪ من باقي أنواع السفن, يعني التعميق و التوسعه ممكن تساعد في زياده عدد ناقلات البترول الضخمه فقط و لا تأثير لها علي أنواع السفن الأخري لأنها كلها ممكن تعدي من غير توسعه و لا تعميق.
• ناقلات البترول العملاقه اللي أكبر من السويس ماكس نوعين
ال VLCC- Very Large Crude Carrier ,
ULCC- Ultra large Crude carrier
إحنا مينفعش يعدي عندنا ال ( ULCC (Ultra Large Crude Carrier) لأنها بتحتاج تعميق يصل الي 35 متر و بتحتاج موانيء مخصوصه و دول بياخدوا طريق رأس الرجاء الصالح, أما ال VLCC فالغاطس بتاعهم بتراوح بين 21 متر و 28 متر, فبعضهم لحد غاطس 21 متر بيقدر يعدي في قناه السويس و و البعض الأخر اللي الغاطس أعمق بيخف الحموله من البترول و بتعدي في أنابيب سوميد و بيرجع يملا تاني في سيدي كرير او بيخف حموله علي سفن أصغر. لكن دي عمليه مكلفه و بتاخد وقت كتير.

الأهداف المعلنه للمشروع الأتي:
·      الهدف الأول من مشروع القناه الجديده هو تقليل فتره الأنتظار و زياده سرعه التقاطر, علشان المتوقع سنه 2023 هيصل حجم المرور في القناه الي 97 سفينه يومي
·      الهدف التاني هو تعميق القناه الي 24 متر بحيث تستوعب ناقلات أكتر من فئه
 (VLCC- very large crude carriers also known as supertankers) اللي بتحتاج غاطس بين 21 متر و 28 متر, و حموله تصل الي 300 الف طن. علما بأن التعميق لحد ٢٤ متر مش معناه زياده الغاطس الي ٢٤ متر، لأن غاطس السفن لازم يبعد من ٢ الي ٤ متر من قاع القناه.
·      الهدف التالت المروج له إعلاميا من تحت لتحت هو قطع الطريع علي مشروع خط القطار (ميد ريد) اللي إسرائيل بتفكر تعمله بين ميناء. ايلات علي البحر الاحمر و ميناء اشدود علي البحر المتوسط بطول ٣٥٠ كم.
طيب, لو قارنا إحصائيات عبور القناه في الخمس سنين اللي فاتت بدأ من إنهيار السوق العالمي في 2008 هنلاقي إن عدد للسفن بيقل من 17993 سفينه في 2010 الي 17148 سفينه في 2014, لكن في نفس الوقت اللي فيه عدد السفن بتقل نلاقي إن متوسط الحموله للسفينه بيزيد من 47 الف طن في 2010 الي 57 الف طن في 2014. نقدر نستنتج من ده إن في توجه نحو الإعتماد علي سفن أكبر و بالتالي التعميق هيكون مهم لإستيعاب التوجه العالمي نحو السفن الأكبر ذات الغاطس الأعمق. و ده بيصب في صالح أهميه التعميق و التوسيع للقناه الحاليه لإستيعاب النمو المتوقع في السفن الأكبر حجما ذات الغاطس الأعمق.

و زي ما قلنا في المعطيات السابقه إن القناه بحالتها الحاليه بتستوعب إن يعدي منها تقريبا 100% من أنواع السفن, و بتستوعب إن يعدي منها 64% فقط من أنواع ناقلات البترول, لأن الناقلات الكبيره أوي متقدرش تعدي علشان العمق. نقدر نستنج من كده إن أي شغل في القناه الهدف منه زياده حصه مصر من عبور ناقلات البترول.

طيب, إحنا مر من القناه عندنا سنه 2014 عدد 4,053 ناقله بترول, منهم 73 ناقله بترول من فئه ال VLCC ( تقريا 2% من ناقلات البترول اللي بتعدي في القناه من فئه ال VLCC) و زي ما قلنا إن الفئه دي نسبه كبيره منها مينفعش تعدي في القناه علشان عمق الغاطس أو تكلفه تخفيف الحموله. و بعد التعميق عدد أكبر من ناقلات ال VLCC تقدر تعدي من القناه.
بمعني أدق إن الهدف القصير الأجل هو زياده عدد ناقلات البترول من فئه ال VLCC لحد غاطس 22 متر اللي تقدر تعدي من القناه بعد التعميق.
و بالتالي نقدر نحسب الجدوي الإقتصاديه القصيره الأجل بحسبه بسيطه:
إجمالي عدد ناقلات البترول VLCC في العالم سنه 2014 بلغ 638 ناقله بمتوسط 6.5 رحله سنويا للناقله الواحده, يعني حوالي 4150 رحله سنويا, و لو أخدنا حصتنا العالميه و هي 8% من إجمالي النقل البحري العالمي يبقي هيعدي عندنا 330 سفينه. و زي ما قولنا إن جزء فقط من هذه السفن اللي الغاطس بتاعها لا يتعدي 22 متر هيقدر يعدي في القناه, يبقي لو كنا متافئلين جدا  و نفترض إننا هناخد 66% من ال 330 ناقله بترول. علما إن قناه السويس بتشترط علي الناقلات العملاقه اللي عرضها بيصل الي 60 متر إنها تخفف الحموله علشان الغاطس بتاعها  لا يتعدي 16.7 متر علشان حاجه فنيه ليها علاقه بعرض السفينه و عمق الغاطس.(beam to draft)
لكن أستكمالا لمبدأ التفائل الي ماشيين بيه فيه الحسابات. هنفترضإن التعميق قدر يضاعف عدد السفن من فئه ال VLCC الي 3 أضعاف من 73 سفينه الي 220 ناقلله بمتوسط حموله 250 الف طن, ده هيؤدي لزياده إجمالي صافي الحموله السنوي تقريبا ب 36.5 مليون طن , اللي تمثل زياده في إجمالي الحموله السنويه تقريب ب 3.8% (36.5 مليون طن سنوي /962 مليون طن سنوي) يعني لو حولناها فلوس , و ناخد في الإعتبار إن رسوم عبور القناه بتختلف طبقا لنوع الحموله و إتجاه العبور, يعني ناقلات البترول الخام بتدفع أقل رسوم عبور , يليها سفن الحاويات ثم ناقلات البترول و أعلي شريحه سفن الكارجو , لكن إحنا هنحسب علي المتوسط للتبسيط, الزياده في الإيراد بناء علي متوسط رسوم العبور هتمثل زياده من5.405 مليار دولار الي 5.610 مليار دولار. يعني 205 مليون دولار سنويا !!!

الرقم التالت المهم هو إن القناه الجديده هتوفر فتره المرور اللي بتستغرقها السفن للعبور في القناه من 18 ساعه اللي أقل من 11 ساعه, لكن ده مش سبب كافي لحفر قناه جديده النهارده, لأن القناه كده كده بحالتها القديمه بتوفر بتوفر مسافه من 3300 ميل الي 4800 ميل أكتر من رأس الرجاء الصالح و ده علي حسب الرحله , يعني لو الرحله من طوكيو بتوفر 3300 ميل و لو من جده بتوفر 4800 (تقريبا) , يعني علي الأقل بتوفر 10 أيام لو الناقله ماشيه بدون توقف. يعني الست ساعات التوفير مش هما اللي هيفرقوا في زياده الطلب علي المرور في القناه.
أما بخصوص قطع الطريق علي خط القطار (ميد ريد) اللي إسرائيل بتفكر تعمله بين ميناءايلات علي البحر الاحمر و ميناء اشدود علي البحر المتوسط بطول ٣٥٠ كم.
خط القطار ده لو اتنفذ اصلا لا يمثل اي تهديد لقناه السويس لعده اسباب اهمها:
أولا: الخط ده هينقل حاويات فقط و مش هيقدر ينقل اي حاجه سايله أو بترول او غاز او غيره، و الحاويات بتمثل ٣٠٪ فقط من البضاعه اللي بتمر من قناه السويس
ثانيا: ٣٢ مليون حاويه بتعدي في قناه السويس كل سنه، في حين إن دراسه الخط الاسرائيلي بتقول انه اقصي حموله له هو ١٥٠ الف حاويه سنويا ، يعني نص في الميه (٠،٥٪) من عدد الحاويات اللي بتنقل في قناه السويس.
ثالثا: الجدوي الاقتصاديه لخط القطار منعدمه، بمعني إن الشحن البري لحمولة سفينة عبر إيلات قد يستغرق 21 يوما، إذ ستصل كلفة تفريغ وشحن الحاوية الواحدة قرابة ألف دولار، بينما في قناة السويس عبور السفينة لا يستغرق 14 ساعة وكلفة الحاوية الواحدة لا تتعدى 30 دولار.
رابعا: تكلفه خط القطار ١٠ مليار دولار و هيتنفذ في ٥ سنين، و ده مشروع قديم من ايام بن جوريون و متنفذش لحد دلوقتي لعدم جدواه الاقتصاديه.
أما النقطه الجوهريه الخاصه بزياده عدد السفن العابره من 49 سفينه يومي النهارده الي المرجو وهو 97 سفينه يومي سنه 2023, العامل المؤثر في زياده عدد السفن الماره في القناه هو نمو حجم التجاره من و إلي أوروبا, و ده إبتدي يحصل فعلا بس بنسبه نمو ضعيفه , يعني طبقا لمعدل النمو في حجم التجاره ممكن نقدر نوصل لأقصي عدد من السفن العابره حاليا 76 سفينه يومي في سنه 2020 , و في أحسن الظروف نوصل الكثافه الجديده وهي 97 سفينه يومي سنه 2023 (طبقا للأرقام الحكوميه المعلنه)
نقدر نستنج من ده إن العائد قصير الأجل من مشروع القناه هيكون من تعميق القناه اللي هيسمح بعبور عدد أكبر من ناقلات البترول العملاقه, مش من تقليل وقت الإنتظار أو زياده سرعه المرور.

أقدر استنتج ايه من الأرقام اللي فوق, كذا حاجه:

أولا:إننا مش هنبتدي نستفيد فعليا من زياده عدد السفن الماره في قناه السويس قبل 5 سنين و ده متوقف علي حجم التجاره من أوروبا. يعني كان ممكن تأجيل الحفر للقناه الجديده علي الأقل 5 سنين و إستغلال الفلوس دي في اولويات تانيه.
ثانيا: المكسب الفعلي القصير الأجل هو تعميق الممر الملاحي اللي هيسمح بمرور عدد أكبر من ناقلات البترول العملاقه VLCC, و ده في تقديري مش هيزود الإيراد أكتر من 4% في المدي القريب.
ثالثا: المشروع فعلا مشروع (هندسي) عملاق و إستثمار (يمكن تأجيله) في المستقبل, مش زي ما فيه ناس بتحاول تسفهه, و تنفيذه في سنه واحده إعجاز هندسي, و زي ما إتريقنا علي جهاز الكفته لازم ندي الناس اللي اشتغلت علي الارض في المشروع ده حقهم، و نشيد بيهم لتحملهم المسؤوليه و تحمل تبعات ان مشروع كان مدروس له انه يتنفذ في ٣ سنين و في لحظه تجلي بقت سنه و قبلوا التحدي و نفذوا، و مش ذنبهم إن المشروع كان ممكن المفروض يتدرس احسن من كده او مش أولويه دلوقتي , أو كان ممكن تأجيله و الإكتفاء بالتعميق في المرحله دي, أو توجيه الإستثمارات دي في مشاريع أخري ممكن تدر عائد برضو زي مشاريع الطاقه , أو الإستثمار في تنميه المحور اللوجيستي الخدمي لقناه السويس.
الخلاصه بالنسبه ليا هي مسأله الأولويات, يعني الأولويه الأولي بالنسبه ليا هي الإستثمار في الإنسان سواء صحته أو تعليمه و هو إستثمار لا يقدر بثمن, و لو عايز أستثمر في مشاريع تجيب عائد هتكون الأولويه لمشروع تنميه المحور اللوجستي لقناه السويس اللي ممكن يعمل طفره في حجم الإستثمارات و تنميه مستدامه بجد.  لكن  واضح إن الدوله أولوياتها مختلفه, اولوياتها إنها تعمل مشاريع قوميه كبيره تعمل بيها شو إعلامي حتي لو كانت غير مدروسه جيدا و لا حصل عليها نقاش مجتمعي محترم. و لا من خلال رؤيه متكامله للأولويات. و ده في وجهه نظري مينفعش مع بلد خربانه و مفلسه أساسا. الكلام ده ينفع مع بلد زي الأمارات , اللي ممكن تعمل حاجه زي كده غناوه , لكن في ظروفنا أحنا منستحملش سفه. الموضوع ده عامل زي ما يكون واحد عنده ١٠ عيال فقرر انه يشحت علشان يودي واحد يتعلم في هارفرد علشان يستثمر في مستقبله، و التسع عيال التانين عندهم كانسر و مش لاقيين ياكلوا.
علشان كده بتقول إن النيه الصافيه مش كافيه، و ان المشاريع الكبيره مهم تتعرض بشفافيه تامه للنقاش المجتمعي و أكيد ده هيفتح زوايا تانيه للرؤية ، ويكون فيه مجلس شعب منتخب فيه كفاءات محترمه تقدر تراقب وتدرس وتشرع.
انا عارف انه كلام غلس بس حد لازم يقوله، و أتمني من كل قلبي اطلع غلطان

المصادر:
تقارير سنويه كامله عن قناه السويس
تعريف ناقلات البترول
مقارنه مع رأس الرجاء الصالح

طريقه أحتساب رسوم العبور طبقا لنوع الحموله و الحجم و إتجاه العبور

عدد الناقلات ال VLCC عالميا

مقاله عن خط ميد ريد الاسرائيلي

معلومات عن الجدوي الاقتصاديه المنعدمه لخط قطار ميد ريد
http://www.aljazeera.net/news/ebusiness/2014/10/19/قطار-إيلات-مشروع-اقتصادي-إسرائيلي-بأهداف-سياسية

- See more at: http://albedaiah.com/news/2015/06/28/92264#sthash.0BIqRrbG.dpuf



يسمح بنقل أو استخدام المواد المنشورة بشرط ذكر المصدر أي نوع من التعدي يعرض صاحبه للمسائلة القانونية
حدث خطأ في هذه الأداة