الخميس، 9 أبريل 2009

حسن ومرقص وكوهين





قالك ايه....
حسن ومرقص وكوهين عملو شركة لانشاء محل يقعدوا فيه بدل القهاوي ويتفشخروا انهم اصحاب محل وعندهم مستخدمين وإدارات
اشتغل المحل والبيع مشي ساعات فوق وساعات كتير تحت
أصل المحل كان بيبيع على مزاج الشركاء
اللي يعجبهم يتحط في المحل واللي ما يعجبهمش ممنوع
اللي يحبوه يبيعوله ببلاش
واللي مش تبعهم مرفوض
طب شوية دعاية
طب شوية اعلانات عشان المحل يستمر
مفيش فايدة
لقوا المحل بيخسر
بدل ما يعرفوا ليه؟ ويناقشوا مشاكلهم اللي مودياه في داهية ويتخلصوا من الازمات اللي هما حطوا المحل فيها
قالوا نقفله ونرتاح
احنا لسه هنتناقش
حسن قال طب والمستخدمين
مرقص قاله ممكن نديهم مكافاة نهاية خدمة
كوهين قال ليه بس هما هيدوروا على شغل في حتت تانية
والشغل زي الهم على القلب هيلاقوا بسرعة
حسن سكت ومرقص ارتاح وكوهين وفر فلوسه
الجيران والمستخدمين قالولهم مش من حقكم تعملوا كده
لقوا الدنيا مش زي ما كانو مخططين
راحوا افتكسوا خطة جهنمية
قال ايه نفتح يوم في الاسبوع
طب ازاي
البضاعة تبوظ
قالوا معلش
خسارة قريبة ولا مكسب بعيد
بس الشركاء ناويين بعد شوية يفتحوا يوم في الشهر
وبعدين يوم في السنة
وسلملي على مكتب العمل

هناك تعليق واحد:

  1. مش هقول غير حسبنا الله ونعم الوكيل في حسن ومرقص والتالت بتاعهم عشان نسيت اسمة

    ردحذف